A Schoodingdooch, zweider Deil

Also, nachadla mach i amal weider. Zerscht hab i mer denkt iich sooch nu amal aweng wos zur Bearbeidung der Bilder...des Schwazzweiss hab i mit Lightroom gmacht, wobei iich da aweng des Orange aufdreht hab, des is immer a gouder Drick wenn mer aweng a scheene Haud ham will.  Und aweng dei Kondrasde aus der Middn raus aber derfür hald schauer das mer sei Zonensysdem net ganz vergissd. 

Bei die bunden Bilder hammers a suu gmacht, iich hab der Schdeffi an Haufen Farbstimmungen geschickd und sie hab dann gsacht welche wir nemmer. Dann hab ich ihr des aso gschiggt uns sie hat dann so Sachen wo iich zu bläid dazu bin des zu sehen aweng aufghübscht. Und zum Schluss hab iich die Farbstimmung dann hald doch no aweng verändert, weil iich dann auf einmal doch a Meinung ghabt hab. Ihr sehd, des sind Prozesse, die da im Hindergrund ablaafen, des is eine Ärberd, des wenn net suu schee wär und asu an Sbass machen däd, nachadla kennerdes vergessen.

So, und dann simmer also naus. Iich wollt ja nach Gusdenhuuf, da zou dem Bolzplatz neber dem Kindergardden in der Austrass aber da stenger etz lauder so bläide S-Bahner und gor kanne Container mehr. Na und dann had dei Nadine gschacht, da bei der Rennschellendisco am Kuhlenhuuf, da kenner mer vielleicht aweng so a Ambiente finden. Na simmer also do hii und was soll i sogn- Asdrein. Der dodale Verhau, genau mei Ding. Also hab i erschd amal gmacht was irchedswie immer geht, a bor Bildla mitm Dele:

Des had mir aa goud gfallen, es war hald recht kald und dadurch wurde die Performens wie ma sou sacht recht audendisch. Und nach aaner kurzn Episode mit einer Dreppe, zu der i vielleichd amal wann anders kumm simmer dann noch ind Sunner ganger, und ich hab midm Weidwinkel a bor Bordräs gschossn. Dabei hab i Obacht geben mäin, wall wennsd des Madla aweng seidlich schdells na schauds aus wai in die Nämbercher Noochrichden wos immer dei Laid midm Subberweitwingel verzerren. Aweng verzerrd hads es natirlich scho, soll ja auch aber soll hald ka Bananagsichd kreign.

die sind etz a reladiv unbearbeided, ich hob blos aweng versuchd die Gondraste halbwegs gebaggen zu bekommen. Bei die oberen hab I die Ohren gfärbt weil die aweng gleuchded ham und iich hab aweng a warmes Lichd zugfügt und aweng a Vinjeddn rumgmacht, falls des aaner wissn will.

Aaf jedn Fall war ich dodal zufrieden am End, eichendlich wolld iich no woanders hi, aber des war asu scho goud gnoch. Und etzer hol i mer an Gaffee und nou gehts lous.

Mir segn uns!

Neuer Artikel in alten Blog

So, etz habi drüber nachgedacht und bin zu dem Schluss gekommen genau so zu schreibn wie ich sprech. Warum? Weil des ich bin, ich kann net gut formulieren, ich bin kei grosser Schreiber, aber labern, des kann ich scho.

Also, etzer bericht ich euch amal von meinem letzten Shooding, des war wirklich dodal fedd!

Zerscht hab I der Sdeffi versucht die Nadine schmackhaft zu machen, weil mir die kurzen Haare zum fodografieren einfach glasse vorkommen sind. Und weil ich a Foddo von der Nadine bei Faißbug gsehn hab wos quasi gor kanne Haar mehr ghabt had, hab ich gleich hier gschriebn, das ich se mal gern foddografiern tän tät.

Na und wall die Sdeffi a goude Haud is und mir und goud versteng, hads dann mit gmacht. Mir konnden uns erscht net wirklich einichen was mer machen, sie wollt was bunds und ich was schwazzweisses und dann hammer halt einfach gmacht.

Zerscht wolld I aweng a Nude-makeup, was des is hab ich a vor kuzem glernt und des find i eigendlich an gouden Einschdieg in a so a Beautyschooding.

Also hammer erschd des gmacht und da hammer dann aweng a schwazzweiss draus gmacht...

des had dann aso aus gschaud:

Wir ham an Beautydish von oben und an Reflektor von unden gnumma und quasi a Shelllight gmacht. Des war easy aber mit dem dezenten Makeup scho gscheid effegtvoll. Und die Nadine hat immer a astreines Gschau gmacht, immer zwischen  gnervt und pissig und ernsd oder a a mal zart, des war asdrein. Da mou i echd nuamol dange sogn.

Na und dann hammer uns aweng auseinanderdiskudiert was mer etzerdla machen, ich wolld aweng so dungl und mid viel schwazz und  hab aber ka Schangs ghabt gecher die Madla und dann wars hald grün und des war a schee...nerja und dann hammer hald des Ringlicht gnumma und ham damit weider gmacht...:

des war hernach ned ganz asu einfach mid der Bearbeidung wall des Ringlich hald scho gscheid kald und a aweng inkonsistent is. Ausserdem bündeld six hald a gscheid in der Midden. A moust  scho aweng obachd geben das der die Farben ned dodal abhauen...in Schwazzweiss gehds meisdens no, aber des is dann was für Feichlinge. Na und dann simmer naus ganger, aber wie des war erzähl i eich morghen. Wenn ihr des wolld, überhabts...ach suu, ja, dann habbi nu aus Gaudi ans midn Handy gefinished und des schaud a ganz cool aus find i...des Orchinol war a su:

 und a su hob is verschlimmbesserd:

Also, dann, mir segn uns!

ach, doud mer leid das dei Bildanzeiche su bescheuert is aber so is des hald, dafür kosds nix.